АРТОС - часопис Общества св. Йоана Крестителя

Časopis Artos začav svoju dorohu v 2005 r.

  "Na počatku bylo Slovo, a Slovo bylo u Boha, i Boh bylo Slovo." (Joan 1,1)  

  Slovo, kotre vychodiť z Božych ust, tot duchovnyj chľib, bude sja vam, dorohy našy virniky, snažyti čim časťiše prinesti i naš časopis ARTOS. Nazvaňa Artos, v našij bisiďi: chľib, Ahnec’, Baranok, Isus Christos, ne bylo vybrane našym Obščestvom sv. Joana Krestiteľa lem tak nespoďivano.Každyj z nas, i paru raz čerez deň, sidať ku stolu, žeby sja nasytiv i pidkripiv. Pri stoľi, ci už v našych rodinach, na svaďbi i na krestinach, abo pri dejakych jubilejach, nadvjazujeme medži sobov prijateľstva, poskaržyme sja jeden druhomu, poradime si, posmilime sja...
A tak podobno to mať byti i z duchovnym chľibom – Božym slovom. Ono nas mať z’jednavati vjedno pri stoľi z Isusom Christom. Christos i nas choče nasytiti, pidkripiti i posmiliti, žeby s’me svidčili o viri. A take svidčiňa o viri mať byti javne „medži tym čudžoložnym i hrišnym pokoľiňom“. Mk 8, 38
Zato tot duchovnyj chľib i vece raz čerez deň berme i chosnujme, čitajme, pidkripľajme sja nim i vertajme sja ku ňomu, žeby s’me duchovno ne oslabli.

Christos posreďi nas.

(Vstupne slovo časopisu Artos  č. 1/2005)

---------------------------------------------------------------------------------

  Ľube rusiňske bratstvo, dorohy grekokatoliky!

  Začiname orati novu borozdu. Pluhom je christijaňskyj časopis, kotryj teper’ trimate v rukach. ARTOS je slovo pro mnohych nove, pro dakotrych čudže. No pro naš vostočnyj obrjad ne je ani nove, ani čudže. Stričame sja z nim v časi Velikodňa – Paschy. Je to grec’ke slovo, kotre značiť chľib. No chľib ne choc’jakyj, ale takyj kotryj simbolizuje voskresšoho Christa medži nami. Je to kvasenyj chľib, kotryj sja posvjačuje v samotnyj deň Paschy i cilyj Svitlyj tyždeň je položenyj v cer’kvi pered ikonostasom. V subotu pered Tomovov neďiľov sja rozďiľuje i davať jisti virujučim.
Artos je i simbolom chľiba vičnoho žyvota. Naš časopis bude nesti joho nazov. Bude to časopis, čerez kotryj chočeme davati dušam obžyvu, i duchovnym slovom pidkripľati rusiňskych grekokatolikiv, žeby mali viru žyvu. Budeme prinošati teologičny, liturgičny i istoričny staťi, a tyž informaciji zo žyvota Obščestva sv. Joana Krestiteľa. Proto každyj jeden z vas može pomoči tomu ďilu svojima molitvami, no i svojima staťami. Možuť to byti i prihody z cer’kovnoho ci osobnoho žyvota, kotry s’te perežyli vy, vašy rodiči, braťa, sestry, blizky, prijateľi... Svoji staťi posylajte na adresu redakciji.
Artos bude spočatku vychoditi štyri raz do roka a budeme v ňim na posľidňich storinkach prinošati i kalendarijum na tri misjaci.
Naj Hospoď Boh blahosloviť naše ďilo, žeby spravdy naš časopis - novinočka ťišyv vas každyj deň do ročka.

Christos posreďi nas.

(perevzjate z Artosa č. 1/2005)

Možete sobi ho prositi i u svojoho otcja duchovnoho,

kotryj vam može časopis objidnati.